Gobernador di Aruba ta na cabes di e gobierno di Aruba. Den e funcion aki e ta representa Rey Hulandes. Banda di esey Gobernador ta representante di gobierno di Reino. Cu esaki, Gobernador ta e simbolo di union di Reino na Aruba, como pais autonomo dentro di Reino Hulandes.
Gabinete di Gobernador di Aruba ta sostene Gobernador di Aruba den ehercicio di ambos tarea.
Na 1954 a introduci Statuut di Reino Hulandes. Desde e tempo ey tabatin un Gobernador pa e seis islanan di loke antes tabata Antias Hulandes. E Gobernador ey tabata ubica na Fort Amsterdam, na Willemstad (Corsou). Te cu 1985 Aruba tambe tabata forma parti di Antias Hulandes.
Desde 1 di januari 1986 Aruba tin e status di pais dentro di Reino y un propio Gobernador. Corsou y Sint Maarten for di 10 di october 2010 tambe ta paisnan dentro di Reino y desde e momento ey nan tin un propio Gobernador.
