E paspoort di emergencia y e laissez-passer ta documento di biahe temporal. Ora cu un persona cumpli cu e condicionnan, e por aplica pa esaki. Por haci esaki na e departamento di asuntonan consular di Gabinete di Gobernador.
Personanan cu nacionalidad Hulandes mester pidi un paspoort di emergencia. Personanan cu ta dispone di un otro nacionalidad cu esun Hulandes, ta pidi un laissez-passer.
Personanan cu mester biaha relaciona cu un situacion di emergencia, cu prome cu inicio di e biahe no tin un documento di biahe balido y cu no a pidi un documento nobo, por ricibi un documento di biahe di emergencia. Esaki por tambe den caso di perdida of ladronicia di e documento di biahe regular. Por usa e paspoort di emergencia y e laissez-passer solamente como documento di biahe. Nan no tin validez como prueba di identidad of carchi di identidad.
Ta suministra un paspoort di emergencia solamente si tin claridad cu e persona ta dispone di nacionalidad Hulandes. Pa esey mester entrega documento probatorio. Tambe lo mester tin un motibo urgente pa biaha. Por ehempel un motibo di caracter medico of pa motibo di fayecimento di un familiar den 1er of 2do grado. Mester demostra e urgencia pa biaha door di enrega di documento (di biahe).
Validez paspoort di emergencia
Den caso cu un persona mester biaha pa exterior pa motibo medico, ta emiti un paspoort di emergencia cu validez di 1 aña. Si e biahe tin un motibo no-medico, e ora ey ta emiti un paspoort di emergencia pa duracion di e biahe.
Si e persona biahando pa motibo no-medico, no ta bolbe pa Aruba, e paspoort di emergencia lo ta valido pa duracion di e biahe di ida. Si e persona ta bolbe pa Aruba, e documento lo ta valido te cu e fecha di regreso manera indica ariba e ticket di regreso. Despues di regreso mester entrega e paspoort di emergencia na Gabinete di Gobernador na Aruba. Como alternativa por entrega e documento tambe na Censo, unda por haci peticion pa un paspoort nacional nobo.
Den situacion di emergencia excepcional por suministra un laissez-passer na personanan cu un nacionalidad cu no ta esun Hulandes. Aki tambe mester trata di un motibo urgente pa biaha, manera un expedicion medico di AZV. Persona cu nacionalidad Colombiano, Venezolano, Haitiano of Dominicano no ta bini na remarca pa un laissez-passer. Nan mester dirigi nan mes na nan consul (honorario) estableci aki na Aruba.
Validez laissez-passer
Den caso cu un persona mester biaha pa exterior pa motibo medico, ta emiti un laissez-passer cu validez di 1 aña. Si e biahe tin un motibo no-medico, e laissez-passer lo ta valido pa duracion di e biahe pa e pais di destino, pues solamente pa e biahe di ida.
Den caso cu mester biaha di regreso pa Aruba, na e pais di destino e persona mester tuma contacto cu e representacion of consulado di e pais di origen (di e propio nacionalidad), pa peticion di un documento di biahe nobo pa regresa pa Aruba.
Atencion: Cierto pais ta pone exigencia adicional of diferente na un documento di biahe. Por ehempel cu e persona mester tin un visa. E embahada of consulado di e pais concerni por informa un persona si e pais ey ta acepta e paspoort di emergencia. Gabinete di Gobernador di Aruba no ta acepta responsabilidad si e biahe no por sigui (na tempo). Tambe den caso cu e Gabinete ta hopi ocupa, e responsabilidad ta pa e persona cu ta biaha.
En principio no ta posibel pa biaha cu un paspoort di emergencia pa Estados Unidos (Merca). Pa mas informacion por tuma contacto cu Consulado General di Merca na Corsou via number di telefon +5999 461 3066.
Den caso di un biahe pa motibo medico, AZV ta inicia e peticion pa un paspoort di emergencia of un laissez-passer. Seguidamente AZV ta informa Gabinete di Gobernador, cu na su turo ta informa e cliente cua ta e documentonan cu e mester entrega. Despues e persona aki por pasa segun cita na e Gabinete pa entrega tur formulario y firma esakinan. Ora cu e dossier ta completo, e persona por ricibi e documento di biahe.
Den caso cu e biahe tin un motibo no-medico, e persona mes mester tuma contacto via di telefon cu Gabinete di Gobernador. Un colaborador lo informa encuanto e documentonan necesario pa e persona su situacion specifico. Despues e persona aki por pasa segun cita na e Gabinete pa entrega tur formulario y firma esakinan. Ora cu e dossier ta completo, e persona por ricibi e documento di biahe.
Costo
E tarifa pa un paspoort di emergencia of laissez-passer pa 2024 ta: Afl. 112,00.
Tin ora tin un situacion medico sumamente grave y agudo. Den casonan asina un colaborador consular di piket por elabora un documento di emergencia fuera di orario di oficina. Pa esey ta exigi cu AZV ta confirma por escrito cu e persona mester biaha pa motibo medico agudo. Pa e casonan aki tin un colaborador consular di piket disponibel via number di telefon 593-7919.
